حكــــاية عم محمد ..الجزء الثاني

حــكاية عــــم محمد ..الجزء الثاني

وصلنا في نهاية الموضوع اللي فات على سؤال
قولنا ايه اللي بيأخر المكالمه لما بكون بكلم بورسعيد او بكلم اي محافظة تانيه ؟؟
الفكره زي مقال كده كاسبر في التعليق على الموضوع السابق وزي مقالت نقطة ميه برضه
اننا بنكلم عم محمد صاحبنا ونقوله يا عم محمد انا عايز اكلم بورسعيد او يعني حكلم سنترال تاني غير السنترال بتاع الحي بتاعي
يعني انا في بورفؤاد مثلا وعايز اكلم حي تاني في بورسعيد
فيبدأ جدي يقوله الو يا محمد افندي
اديني نمره 34256
فيعرف محمد افندي ان الرقم ده في بورسعيد وهو عنده خط ترانك واحد بينه وبين سنترال بورسعيد

وخط الترانك ده وصله كده زي الوصلة اللي بينك وبين عم محمد اللي بتكلمه عليها لكن ده طويل شوية وبيمشي من سنترال لسنترال تاني مش من مستخدم لسنترال زي الخط بتاعي وبتاعك

المهم

يروح عم محمد مستخدم خط الترانك ده يكلم مين ؟؟هااا

أيون عم ابراهيم صح
وعم ابراهيم ده هو عامل السويتش بتاع السنترال التاني اللي في بورسعيد
يعني كده بقت المكالمة من جدي
الى محمد افندي
ومحمد افندي وصل الخط على الترانك
بقت المكالمة عند ابراهيم افندي

ييجي بقا ابراهيم افندي يعمل زي محمد افندي في البوست اللي فات
يوصل خط الترانك اللي جاي عليه المكالمه بتليفون الراجل اللي جدي عايز يكلمه

طبعاً شوفتوا الموضوع ده اخذ اد ايه وقت
شوفوا بقا لما انا هنا في بورفؤاد
وعايز اكلم القاهره؟؟

يروح محمد افندي من بورفؤاد يوصل بترانك على بورسعيد
ومن بورسعيد ترانك على اسماعيليه مثلا
ومن الاسماعيليه ترانك على القاهره

يعني اخذ كذا محطة وفي كل محطه
يعرف عامل السويتش ان المطلوب في محطه تانيه
يروح موصل المكالمة على خط الترانك اللي عنده اللي مربوط بالمحطة التانيه
وهكذا لحد لما يتوصل الاثنين مع بعض

وبعدها بقا تلاقي تليفونك بيرن

!!!!!!!!
طبعاً الموضوع ده كان بياخد وقت طويل جدا
ليه؟؟؟؟
علشان خط الترانك ممكن يكون مشغول مع حد فمنقدرش نستخدمة الا لما يفضي
وبعدين متضمنش الخط اللي بين المحطتين اللي بعد كده فاضي واللا لأ فتضطر تستناه لحد ميفضى
وهكذا

وده اللي كان بيأخر المكالمات اوي
انها بتلف اللفة دي لحد متوصل الاثنين مع بعض في نفس الوقت

يعني تكون انت واللي بتكلمه ماسكين السماعة يعني

وياسلام بقا لو كنت اللي انت طالبه مشغول

:P:P:P:P
نرجع نعيد تاني ونجرب لحد ميفضى

ده بالنسبة لتأخير المكالمات

************************************
بالنسبة بقا ليه الصوت كان بيبقا بعيد
علشان الاتصال في الوقت ده كان بيعتمد على الوصلات زي مقولتلكم يعني بيمشي الصوت في السلك بطريقة معينه
وكل م السلك يكون طويل يعني المسافة بين الاثنين كبيره يعني
طبعا الصوت بيبوظ وتلاقي نفسك مش سامع حاجه

علشان كده الموضوع كان حيص بيص خالص والمكالمات كانت بتدخل في بعض نتيجة لغلط عامل التليفون لو وصل اثنين غير اللي عايزين بعض... وكانت المكالمة بتتأخر علشان المسافة الطويلة وكانت بتيجي مش واضحة علشان برضه المسافة اللي بتقطعها طويلة فبتكون المكالمات معرضة لحاجات كتير تأثر في المكالمة وتبوظها زي ان السلك مثلا تكون فيه حته بايظة

ماشي الحال ؟

*******************************

اقولكم بقا ايه حكاية الارقام دي بقا
بعد لما كترت التليفونات
ودخل عصر الالات
بقا علشان نحدد كل سنترال من ضمن السنترالات اللي في كل محافظة
لازم نعرفه برقم
يعني دلوقتي انا عايز اكلم بورسعيد وانا في القاهره

لازم اطلب 066 يعني ايه دي
يعني يا سنترال انا عايز اكلم واحد في بورسعيد الصفر يعني عايز مباشر لمكان في محافظة تانيه

وال66 هو رقم بورسعيد المتعارف عليه في مصر
يقوم السنترال دلوقتي اتوماتك يحولك على خط الترانك بتاع بورسعيد
وبعدين انا حضغط بعد ال066 دي 34 مثلا

ثلاثة دي في سنترالات بورسعيد يعني الرقم السابع اللي تمت اضافته لبورسعيد ورقم اربعة ده يعني انا عايز حي بورفؤاد

وبعدين يطلب الرقم اللي هو رقم تليفون البيت نفسه
طب لو انا عايز اطلب القاهره مثلا
وانا في بورسعيد
اسم الله عليك
اطلب 02 يعني عايز القاهره
ومنها اطلب الرقم المكون من رقم الحي نفسه ثم رقم المنزل اللي انا عايزه

اللي بيحصل بالتفصيل
اني اول لما بدوس 0 وبعديه اي رقم غير الواحد يعني عايز تليفون ارضي مش موبايل
فأتوماتك بيبعتني السنترال بتاعي على خط ترانك الى سنترال رمسيس المركزي وفي سنترال رمسيس يستنا بقا باقي الرقم
دوست مثلا 3
يبقاانت طلبت دلوقتي 03 يروح سنترال رمسيس محولك على الاسكندرية على طول علشان الاسكندرية هي اللي كودها 03
وتكمل باقي الرقم زي مقولنا مثلا 6 يعني حي معين ثم رقم البيت
الطريقة دي دلوقتي بتشتغل ديجيتال يعني توماتيكي توماتيكي على رأي عادل امام يعني في قمة السرعة
علشان كده الاتصال مش بياخد غير الثانية بس اللي بتستناها لحد ميجيلك الجرس ان اللي انت طالبة فاضي ومستني المكالمة وانت مستنيه يرد
**************************************************

بالنسبة لموضوع الرقم الثامن ده بقا يا جماعة ياللي في القاهره

الفكره ان القاهره كبيره اوي ففيها عدد سنترالات كتيره جدا

طل لو انا عندي 9 سنترالات خلاص يبقا ارقامهم مثلا من 1 لحد 9

طب لما عدد السنترالات يزيد وعدد المشتركين يزيد

لازم ازود الارقام علشان اقدر احدد بشكل اسرع السنترال نفسه اللي انا عايزه بالشكل اللي قولت عليه قبل كده

------------------------------------------
ازاي بقا السنترال بيعرف انك بتطلب الرقم الفلاني
وازاي بيديلك صوت الرنه دي وازاي اللي بتتصل بيه بيعرف ان فيه حد بيكلمه
ده برضه اللي حنعرفة ان شاء الله البوست الجاي
الموضوع ايه اخباره
سهل واللا الاسلوب كلكع مني المره دي ؟

حــــكاية عـــــــــــم محمد

حكاية عم محمد
الواحد بقاله كتير مكتبش هنا عايز ابقا اظبط مواعيد بقا علشان اكتب
وحشتني المدونة ووحشني زوارها ووحشتني الاسئلة
--------------------------------------------------------
عايز اتكلم النهارده عن التليفونات

وحكاية عم محمد

ندخل في الموضوع على طول
زمااااااااااااان ايام جدي وجدك وفي الافلام القديمة كنت تشوف وتتفرج على فيلم زي الشموع السوداء بتاع صالح سليم كده او اي فيلم مشابه
تلاقيه بيقولك: انا قاعد شوية مش حنام علشان مستني مكالمة من مصر
وهو مثلا يكون قاعد في عزبته في اي محافظة تانيه
كان بيستنا المكالمة تجيله وكانت تتأخر وزي مقال احد المدونين الجدد صاحب مدونة كده بيقول انك كنت تروح تزور قرايبك وتسافرلهم تسلم عليهم وترجع ومتكونش المكالمة لسه وصلتك
وكنت كمان زمااان تسمع الناس بتزعق
الووووووووووووو عليييي صوتك مش ساااامعك
وتروح مدة المكالمة على 2 بيزعقوا لبعض ومحدش فيهم سامع التاني
وكنت تسمع زماااان يقولك ده ترانك والناس تجري ويفضلوا يزعقوا برضه علشان يسمعوا

ده الحال زمان ايام جدي وجدك
ولكن دلوقتي الحال اتغير زي مأحنا عارفين وبقت المكالمات على طول في السريع وكمان الموبايل بقا دولي
نجيب بقا الموضوع من اول عم محمد وحكاياته معانا
ونعرف عم محمد: وهو عامل التليفون اللي كان بيقعد في السنترال وكنت بتكلمه علشان تطلب منه المكالمة
يعني عامل السويتش

كان زمااان لما جدي وجدك كان بيلبس الطربوش كده ويتمشي في البيت
كان يحب يسأل على زميله او صاحبه او يحب يزوره فيقول لما (اشد له ) تليفون علشان اقوله اني جاي
فكان يرفع السماعة
يستنا شوية
يلاقي صوت عم محمد يقوله جدي مصاء الخير يا محمد افندي
يقوله اهلا يا حامد افندي أيوها خدمة
يقوله اديني بيت سعيد افندي اكلمه
يقوم عم محمد يقوله طيب يا فندي
ويقوم عم محمد وعنده كده بتاعة زي صندوق العجايب
فيها شوية اخرام وشوية سلوك ادامه
يقوم موصل الفتحة بتاعة جدي دي مع الفتحة بتاعت سعيد افندي
ويقوم رانن جرس عند سعيد بيه علشان سعيد بيه يعرف انه جايلة مكالمة
ويقوم عامل الزماره بتاعت الرنه دي عند جدي علشان يعرف ان المكالمة اتوصلت ويستنا بقا سعيد افندي يرد عليه
الكلام ده كان مثلا في بورفؤاد مثلا او في حي من احياء بس
يعني عم محمد بتاع السنترال ده كان بيبقا عارف الناس اللي في الحي بالاسم فيقدر يوصلهم ببعض
وكلها ايه غير انه يوصل السلك بالمكان المطلوب وخلاص
بعد فتره زادت اعداد التليفونات في البلد وزاد اعداد الناس في البلد
فعم محمد اشتكي قالهم: يا ناس حرام عليكم انا مش قادر احفظ اسماء الناس كلها اللي في الحي بتاعي
قولولي اعمل ايه
راحوا طلعوا بحل عبقري
ايه هو الحل ده
نكمل بعد الفاصل
اتصالات اول شبكة للجيل الثالث المتطور في مصر
عدنا
الحل العبقري بقا كان ايه
انهم يخلوا التليفونات بالارقام
يعني بدل م جدي يقوله يا عم محمد اديني سعيد افندي
يقوله اديني 2376 مثلا
يقوم عم محمد مدور عنده على الرقم ده يلاقي انه بتاع سعيد افندي يروح موصل السلك اللي عنده بالفتحة بتاعت الرقم بتاع سعيد افندي وبكده تتم المكالمة
فاكرين نظام الكوز بتاع زمان ده

لما كان 2 بيوصلوا سلك بين كوزين ويكلموا بعض من الكوز
اهو نفس النظام كده بيوصل عم محمد السلك فيبقا كأن تليفون جدي هو الكوز الاولاني وتليفون سعيد افندي هو الكوز التاني

يااااه مش مصدأ ده جدي اللي بيقول
بقا انت يا سعيد بيه تعمل كده
اه والموضوع و
كيت وكيت وكيت وكيت

ده مضمون المكالمة

بعد لما المكالمة تخلص يقفل جدي او يقفل سعيد افندي مثلا لو مش طايق جدي فيقفل في وشة السكه
المهم ان السكه اتقطعت
تروح منورة لمبة عند محمد افندي في السنترال
ويقطع الخط والوصلة اللي كان موصلها

صح مش ده اللي كان بيحصل زمان

تلاقي في الافلام ييجي السيد راضي ويرفع السماعة
ويقوله
الو....سويتش
ازيك يا سويتش
اديني اوضة 512
صح مش ده اللي كان بيحصل ؟؟
كان عامل السويتش اللي هو اتفقنا انه عم محمد
هو اللي كان بيوصل الخط بتاع اوضة السيد راضي مع اوضة 512
ده بالنسبة للمنطقة المحلية يعني فندق
حي صغير فيه عدد تليفونات قليل
شركة مثلا او كليه
فكان هو ده النظام
كل واحد عنده تليفون يبقا ليه سلك واحد في السنترال يقدر يستخدمة علشان يطلب بيه اي رقم وعم محمد قاعد علشان يوجه الناس
طب ايه بقا اللي بيأخر المكالمة لما بكون بكلم بورسعيد او بكلم محافظة تانيه
ليه المكالمة كانت بتتأخر اوي كده
اصل بعد لما كنت بكلم عم محمد كان

اممممم

نكمل البوست الجاي

--------------------------------------
على الهامش
عايزكم تخمنوا ايه اللي كان بيحصل عند عم محمد
علشان البوست ده طول
واوعدكم ان شاء الله مش حـتأخر في الجزء التاني علشان ده مرتبط ببعضه
والصورة الثانية قتبستها من موقع عبقرينو وشكراً لصديقي احمد البلاسي